Manumea (poster)

O le Manumea o le ituaiga o lupe ua nao le motu o Upolu ma Savaii o le atu Samoa e maua ai. E tulaga ese lava lea manu i le lalolagi. O foliga ma le tino mai lava o le lupe, ae ese ai lava lona gutu. O le auvae-a-luga e pio i lalo ae maai le pito ona fesauai lea ma le auvae a lalo. O le gutu la lea ua mafua ai ona maua le igoa faapalagi o le “lupe gutu fisi”. O le ituaiga gutu nei e aoga tele mo fatu laau malo, ona e le gafatia e le tele o manulele ona tatae. O fualaau nei e maua i le vaomatua, e pei o le maota, aoa ma le atone. E faamau e le lave maai le fatu ae taumafai le auvae-a-lalo e tatae le atigi ina ia maua le aano i totonu.